Até trinta serán os auxiliares de policía local que seleccionará Sanxenxo para reforzar o persoal deste corpo municipal durante os meses de verán.
Será a través dunha bolsa de emprego que xa foi convocada e á que se presentaron un total de 123 candidatos e candidatas. É dicir, catro aspirantes por cada praza.
O Concello solicitou á Axencia Galega de Seguridade Pública que se encarguen das probas selectivas no municipio, de forma que se poida dunha bolsa coa que reforzar o persoal fixo, formada por 23 policías e catro auxiliares de policía fixos descontinuos.
As persoas aspirantes deberán realizar as tres probas incluídas no proceso de selección: un cuestionario de 50 preguntas tipo test, unha proba de coñecemento de galego e outra de aptitudes físicas.
Os membros do tribunal de selección reuníronse esta mañá no salón de plenos para fixar os prazos das probas.
A teórica realizarase este venres no salón de actos do Pazo Emilia Pardo Bazán e as probas físicas celebraranse a próxima semana no campo de fútbol municipal de Baltar.
Os que superen o proceso de selección e integren a lista de reserva deberán completar un curso teórico-práctico obrigatorio, impartido pola Agasp, para poder ser contratados.
Esta formación constará de 24 horas presenciais e ten como propósito preparar aos futuros auxiliares para desempeñar as súas funcións de maneira efectiva durante o período de contratación.
O primeiros quince auxiliares incorporaranse o próximo 15 de xuño e os outros quince farano a partir do 1 de xullo.