O alumnado do CEIP Chancelas viviu este venres unha xornada moi especial coa inauguración do novo patio sostible do centro.
A actuación, desenvolvida grazas á cooperación entre a Consellería de Educación, o Concello de Poio e o propio colexio, contou cun investimento próximo aos 45.000 euros e permitiu crear unha nova zona verde pensada para o desfrute e a convivencia da rapazada.
O acto estivo presidido polo conselleiro de Educación, Ciencia, Universidades e Formación Profesional, Román Rodríguez, e polo alcalde de Poio, Ángel Moldes, que quixeron acompañar á comunidade educativa nesta celebración.
Durante a visita, os estudantes de 5º e 6º de Primaria foron os encargados de presentar e explicar as distintas actuacións realizadas tanto no patio como no proxecto de transformación da contorna escolar impulsado polo propio alumnado.
"O máis valioso desta iniciativa é que nace da implicación e do traballo conxunto de alumnado, profesorado e familias", destacou o conselleiro, quen puxo en valor este tipo de experiencias por favorecer aprendizaxes vinculadas ao territorio, á sustentabilidade e á participación activa dos estudantes na mellora da súa contorna.
Un dos aspectos máis singulares do novo patio é a súa filosofía sostible xa que o espazo foi creado mediante a reutilización de materiais procedentes doutras actuacións municipais. Así, aproveitouse o céspede utilizado nas Aldeas de Nadal de Poio e a terra resultante das obras da pista de Vilariño para crear unha nova área verde. Pola súa banda, o centro encargouse do mobiliario de xogo e a Xunta colaborou coa instalación do sistema de rega.
Durante a súa intervención, o alcalde de Poio destacou que a actuación foi moito máis alá da reparación inicial do pavimento solicitada polo centro. "Hoxe non presentamos unicamente a inauguración dun patio, senón o resultado dunha forma de traballar e de entender a educación", afirmou. Segundo explicou, unha pequena mellora acabou converténdose nunha transformación integral que deu lugar a un espazo sostible e adaptado ás necesidades actuais do alumnado.
Moldes tamén quixo subliñar a importancia educativa dos patios escolares. "Non son só lugares de recreo, senón espazos onde os nenos e nenas aprenden a convivir, compartir, relacionarse e medrar", sinalou.
A inauguración coincidiu ademais coa celebración do Día Mundial do Medio Ambiente, unha circunstancia que serviu para reforzar a mensaxe de compromiso ecolóxico que inspira o proxecto.
Tanto o alcalde como o conselleiro destacaron o labor desenvolvido polo equipo directivo e o profesorado do CEIP Chancelas, que levan anos promovendo iniciativas relacionadas coa sustentabilidade e a innovación educativa.
