Desde que no ano 2016 celebrou o seu 50 aniversario, a Brigada Galicia VII, Brilat, non organizaba unha parada militar fose da súa base. Seis anos e unha pandemia despois, regresou á Alameda para conmemorar o 150 aniversario do seu rexemento base, e tamén o máis antigo, o Rexemento Isabel a Católica 29. E a súa presenza non pasou desapercibida, senón que centos de persoas quixeron acompañarlles.
A parada militar empezaba ás 12.00 do mediodía, pero os pontevedreses xa esperaban desde polo menos hora e media antes. Cando pasadas as dez da mañá a Banda de Guerra da Brigada empezou a asañar, chegaron os primeiros asistentes.
Cando ao mediodía empezaron a desfilar 450 militares, xa eran centos os presentes, que seguiron atentamente o acto a pesar da choiva intermitente que convertía a mañá do sábado en desapracible.
O acto, presidido polo xeneral da Brigada, Luís Cortes, e coa presenza da subdelegada do Goberno, Maica Larriba, comezou con puntualidade militar e serviu para render homenaxe a un rexemento fundado en 1872 e que nos seus 150 anos de historia despregou en catro continentes.
O coronel responsable do rexemento na actualidade, Carlos Augado Valladares, foi o encargado de ler o único discurso do acto, no que deu as grazas especialmente á presenza de antigos integrantes da unidade.
O responsable do rexemento lembrou a súa "vocación expedicionaria" e a participación, ao longo da súa historia, en guerras como as de Cuba ou África, así como a súa presenza nas recentes operacións de mantemento da paz en países como Afganistán, Bosnia- Herzegovina, Kósovo, Iraq, Afganistán, Paquistán, Líbano ou Malí.
"Cohesionados todos baixo as ás do azor", falou tamén dos retos presentes e futuros da Brigada, que están marcados pola súa recente "batalla contra a covid" e pola misión de Malí e o seu papel na Forza Conxunta de Moi Alta Dispoñibilidade ( VJTF, nas súas siglas en inglés) da OTAN, que segue moi pendente da invasión rusa en Ucraína.
No acto tivo especial protagonismo e recordo a recentes operacións Balmis e Baluarte postas en marcha con motivo da pandemia da covid-19. O xeneral da Brigada colocou unha gravata conmemorativa desta operación ao guión do Rexemento e da Compañía en recoñecemento pola súa participación.
Ante a atenta mirada de centos de persoas, desfilaron a Banda de Guerra da Brilat e do Rexemento e cinco compañías, ademais dos mandos, a plana maior e o Escuadra de Gastadores do Rexemento e do Batallón Zamora.
Neste primeiro acto da nova normalidade da Brigada tras a pandemia, non faltou o azor, a mascota da Brigada, que voa en todos os actos oficiais tras a homenaxe aos Caídos. Nesta ocasión, estivo presente, pero resistiuse a facer o percorrido acordado.