Este sábado 27 de agosto celébrase a noite europea dos morcegos e a asociación ecoloxista Vaipolorío desenvolve unha xornada de captura, estudo e explicación das características destes animais en colaboración coa Asociación Morcegos de Galicia, dentro das actividades de Ponteverán, que promove o Concello de Pontevedra, a través da oficina de Xuventude.
Ao longo da noite do sábado integrantes de Morcegos de Galicia, especialistas no estudo destes mamíferos, ofrecerán datos sobre estes animais e desmitificarán as falsas lendas que existen sobre eles. Ademais, as persoas que participen terán a oportunidade de escoitar os sons que emiten.
Esta actividade leva anos celebrándose en sesión nocturna na contorna do río Gafos nesta data coa intención de achegar coñecemento sobre os morcegos á poboación máis nova.
AGRADECEMENTOS AOS AXENTES MEDIO AMBIENTAIS
A directiva de Vaipolorío tamén agradece a intervención dos axentes medio ambientais da Consellería de Medio Ambiente que, durante a última xornada, interviñeron para evitar a morte masiva de troitas e peces no leito do río Gafos, debido ao esgotamento hídrico que se está rexistrando motivado pola seca.
A asociación xa alertara do descenso de fluxo de auga con tramos do río completamente secos. Aprovéitase para salvar ás especies as pozas e fluxos subterráneos que achegan osíxeno, segundo o colectivo, nestes momentos de angustia biolóxica.