A Confederación Intersindical Galega (CIG) en Pontevedra celebrará este xoves 1 de maio unha xornada de mobilización en defensa dos dereitos da clase traballadora galega e contra as políticas neoliberais que, segundo denuncia a organización, están a provocar o espolio dos recursos de Galiza.
Nunha rolda de prensa celebrada na sede da CIG, o secretario comarcal, Marcos Conde, acompañado de Diana Rodríguez, integrante da executiva, presentaron os eixos da convocatoria, que terá lugar ás 12.00 horas desde a praza da Ferrería en Pontevedra, á mesma hora desde a Praza do Mercado na Estrada e ás 11.30 horas desde a Casa do Mar en Vilagarcía de Arousa.
Conde sinalou que "estamos nun momento de confrontación absoluta" onde "as políticas neoliberais e o capitalismo son os adalides da guerra", fomentando o medo e incrementando o gasto militar. "Non é investimento en defensa, é compra de armas", denunciou.
O representante sindical criticou duramente a falta dun proxecto industrial para Galicia: "Non hai un plan de futuro, non hai grandes proxectos máis alá do Camiño de Santiago e de converter Galiza nunha gran finca de eucaliptos".
Neste sentido, mencionou dous exemplos recentes: o proxecto de Altri, que "transforma a paisaxe galega nun monocultivo de eucalipto sen pechar o ciclo produtivo", e a mina de Doade, que xerará "só cen postos de traballo directos" mentres o litio extraído será procesado en Zaragoza, onde se crearán 4.000 empregos.
"Galiza é boa para expoliar e non para montar unha fábrica de baterías?", cuestionou Conde, quen tamén denunciou que "sendo exportadora de enerxía, os beneficios van para outro lado".
A CIG celebrará a manifestación do 1º de Maio de xeito independente, sen unidade sindical con UGT e CCOO, organizacións que, segundo Conde, "xa perderon a condición de clase traballadora" por dar "por boas as últimas reformas de negociación colectiva, as reformas das pensións e as reformas laborais".
A mobilización do 1º de maio en Pontevedra rematará na praza do Teucro.
CONSECUENCIAS DO APAGAMENTO
Pola súa banda, Diana Rodríguez abordou as consecuencias do apagamento eléctrico ocorrido o luns 29 de abril, sinalando as dificultades detectadas na xornada deste martes: "o problema é que os centros de día están pechados, non hai actividade escolar e hai problemas para poder conciliar".
Rodríguez lamentou que "non temos absolutamente ningún tipo de permiso retribuído para xustificar a posibilidade de quedar na casa, algo que recae sobre todo nas mulleres", e engadiu que "vai saír, como sempre, do salario das traballadoras ou terán que recuperar as horas".