A Sala Valdecorvos da Casa Azul na Rúa Sor Lucía acollerá este venres 13 de decembro, ás 19:00 horas, unha nova actividade no marco da Escola de Saúde Pública (ESP) de Pontevedra.
O relatorio, titulado 'Os retos da atención socio-sanitaria na etapa de envellecemento das persoas coa síndrome de Down', será impartido por Sandra Peña Díaz, educadora social e psicopedagoga responsable do Programa de Vida Adulta de Down Pontevedra-Xuntos, a asociación organizadora do evento.
Esta iniciativa, de entrada libre e gratuíta ata completar a capacidade do espazo, forma parte da programación impulsada pola Concellería de Benestar Social, dirixida por Anabel Gulías.
A ESP naceu o pasado mes de novembro co obxectivo de mellorar a calidade de vida da cidadanía, promover hábitos saudables e poñer en valor o labor das asociacións socio-sanitarias, ao tempo que defende a sanidade pública como un dereito esencial.
A actividade do venres será a cuarta das cinco previstas nesta primeira andaina da ESP, todas elas inspiradas na Feira da Saúde e Benestar-Pontesán, un evento xa consolidado en Pontevedra como espazo de reflexión sobre o traballo do tecido socio-sanitario galego.
PROPOSTAS ABERTAS PARA 2025
Ademais, está aberto ata o 20 de decembro o prazo para que as asociacións socio-sanitarias presenten propostas para o programa de actividades da ESP do ano 2025.
Entre as accións que se poden propoñer inclúense charlas, mesas de debate, obradoiros e actividades lúdico-formativas, reforzando o carácter participativo e integrador deste proxecto.
A Escola de Saúde Pública de Pontevedra é un espazo para a aprendizaxe, a reflexión e a acción colectiva no ámbito da saúde e o benestar social, que depende do Concello de Pontevedra.