O comercio de Pontevedra, con Gaza: "Tentamos pór un gran de area individualmente"

Pese ao escaso seguimento da folga de apoio a Palestina convocada durante este mércores 15 de outubro, o apoio dos negocios de Pontevedra á denuncia do xenocidio e o apoio á sociedade palestina vai en aumento.

Os locais non pecharon as súas portas polo paro, pero si deixan ver publicamente a súa postura coa presenza nas súas fachadas dos carteis da campaña solidaria impulsada polo Concello 'Pontevedra con Palestina' e nos seus mostradores coa campaña 'Un Espacio, Una Familia' da plataforma 'Pontevedra con Palestina'. 22 sumáronse xa a esta iniciativa.

Dos 800 carteis repartidos entre negocios e particulares polo Concello, un figura na porta do Culebra Studio de San Antoniño. Unha das súas responsables, Cecilia Paredes, referenda o seu apoio total.

O día a día do seu negocio impediulle pechar as súas portas na xornada de folga, pero móstrase moi concenciada. "A miña postura é totalmente en contra de como se está xestionando todo isto, de como se está tapando", asegura.

No que está nas súas mans, está "a tentar pór un gran de area, que podemos pór individualmente todos".

"Cando hai que saír á rúa se sae e en redes o mesmo, tentando subir algunha ilustración, subir algo de contido que deixe clara cal é a nosa postura, que é que é un xenocidio e que hai que paralo", explica.

Ademais, sumouse a 'Un Espacio, Una Familia' "para axudar directamente a familias". Teñen apadriñada á familia de Alaa, unha veciña de Gaza de 26 anos, casada e nai de dous fillos.

Decidiu unirse á rede de locais impulsada por 'Pontevedra con Palestina' e asignáronlle esta familia. Desde entón, no seu mostrador hai un cartel coa historia de Alaa e un código QR a través do que facer unha doazón directamente a GoFundMe.

A doazón mínima é de 5 euros e, para facilitar a colaboración de persoas que non poidan realizala, á beira da historia de Alaa hai unha hucha na que poder realizar achegas máis modestas. Cando se xuntan cinco euros, desde o establecemento realízase unha nova completa.

En xeral, ve á poblacíón de Pontevedra "implicada". Aínda que non sempre ten tempo para atendela e explicar a iniciativa, o cartel fai que "á xente xéralle a curiosidade" e "á hucha, algúns van".

Cartel similar e historia lamentablemente parecida están na fachada e o mostrador da libraría Depapeis de Cruz Gallástegui, no seu caso, coa historia de Mai, outra nai de tres fillos Caza que explica que "a guerra esnaquizou os meus soños e esperanzas".

Desde 'Pontevedra con Palestina' explican a través das súas redes sociais que esta campaña 'Un Espacio, Una Familia' nace dunha idea sinxela, "que cada comercio de Pontevedra poida apadriñar unha familia concreta e axudala de maneira máis directa a que cada semana reciba algunha axuda".

"Deste xeito, aseguramos que cada familia reciba unha axuda máis constante e significativa", indican, e animan a todos os locais de Pontevedra a participar, pois "o noso obxectivo non é só xuntar moedas, senón armar unha comunidade. Por iso estes espazos serven como pontes para que todxs poidan axudar".

O seu obxectivo: "tecer unha gran rede de persoas que axuden a que estas familias poidan comer todos os días, coidar dos seus seres queridxs, ter auga, refuxio e medicamentos".