Máis de 30 familias poderían quedar sen comedor en el CPI Alfonso VII de Caldas

O Concello de Caldas de Reis acusa á Xunta de Galicia de quedar "moi curta" coa ampliación do comedor do CPI Plurilingüe Alfonso VII e reclama á Consellería de Educación que estude unha solución definitiva para atender a demanda do centro e das familias.

O tenente de alcalde, Manuel Fariña, sostén que a actuación executada polo goberno autonómico, a cal consiste en adaptar os vestiarios do pavillón escolar, "xa demostrou ser insuficiente" tras coñecerse as solicitudes de comedor para o próximo curso.

Segundo explica o goberno local, a ANPA comunicou á consellería que para o curso 2026-2027 rexistráronse 192 solicitudes para un servizo con capacidade para 160 prazas, polo que máis de 30 familias quedarán sen acceso ao comedor.

Fariña lembra que o Concello xa remitiu en 2023 un informe favorable sobre a viabilidade urbanística para construír novos módulos anexos ao comedor en terreos do propio centro educativo.

Ese documento, elaborado polo aparellador municipal, concluía que a parcela permitía ampliar as instalacións cun incremento da ocupación de ao redor do 25%.

É por iso que desde o goberno local acusan á Xunta de "volver chegar tarde e mal" xa que, tal e como explica o alcalde de Caldas, "levamos anos reclamando unha ampliación de comedor porque era unha das principais necesidades do Alfonso VII. A Xunta recoñeceu finalmente que existía ese problema, pero a obra realizada non o resolve".

Afirman, ademais, que "isto era perfectamente previsible. Non estamos ante un incremento inesperado do alumnado, senón ante unha necesidade coñecida. A Xunta tivo tempo máis que suficiente para planificar unha ampliación acorde coa realidade do centro".

O responsable municipal tamén lamenta a forma de actuar da Xunta co ensino público, "especialmente en Caldas", e asegura que este caso reflicte unha forma de proceder baseada en responder unicamente cando a presión social resulta insosteible.

"Non se pode vender como un éxito unha ampliación que nace fracasada", sentenciou Manuel Fariña nunhas declaracións nas que termina instando á Consellería de Educación a estudar unha solución definitiva "que adapte as instalacións do CPI Alfonso VII ás necesidades reais do alumnado e das familias".