O Concello de Marín alertou de múltiples roubos de cableado do alumeado público en diferentes puntos do municipio.
Esta situación está a provocar problemas no funcionamento da rede eléctrica urbana e incidencias en numerosas zonas da localidade.
Segundo informou a administración local, foi a Brigada Municipal de Electricidade a que detectou estas subtraccións, rexistradas durante as últimas semanas.
O primeiro caso localizouse no Sequelo, onde desapareceron arredor de 50 metros de cable. Desde entón, os episodios multiplicáronse e estendéronse a outros puntos do termo municipal.
Entre as zonas afectadas figura o aparcadoiro de O Campo, onde se estima o roubo duns 200 metros de cable soterrado. Tamén se produciron subtraccións detrás do supermercado Mercadona, cun tramo aéreo de aproximadamente 30 metros, e na contorna dos petroglifos, onde desapareceron uns 40 metros de cableado enterrado.
Os técnicos municipais tamén detectaron danos en Portocelo, na área dos magnolios, onde os autores accederon á instalación tras retirar unha tapa de rexistro.
Ademais, na contorna da lavandería situada detrás do Sequelo, os ladróns escalaron un poste do alumeado para retirar outro tramo duns 30 metros.
O incidente máis recente produciuse na zona posterior ao Mercadona e na estrada que discorre por detrás do cemiterio, onde foron sustraídas as baixantes que incorporaban o cable de terra da nova instalación de iluminación LED.
Ante esta situación, o Concello presentou unha denuncia ante a Policía Nacional para que investigue os feitos.
Desde o goberno local sinalan que este tipo de delitos non son exclusivos de Marín e que tamén se están a rexistrar noutros municipios da provincia.
O executivo municipal subliña que, aínda que a cantidade de cable roubada non sexa especialmente elevada en cada actuación, as consecuencias para o servizo son importantes. A desaparición destes elementos pode provocar a interrupción do funcionamento de varias rúas enteiras e deixar sen iluminación entre vinte e trinta puntos de luz.
Mentres continúan as investigacións, o Concello traballa na reparación das instalacións afectadas mediante os recursos da Brigada de Electricidade e co apoio de empresas especializadas, co propósito de restablecer canto antes o correcto funcionamento do alumeado público.