Agresións sexuais, patadas e puñadas, coaccións. Así foi o trato que deu, segundo un tribunal, un pontevedrés á súa parella durante o ano que durou a relación.
O comportamento deste home ten reproche penal e deberá cumprir 21 anos de prisión por dous delitos de agresión sexual, dúas de lesións no ámbito da violencia sobre a muller e un de coaccións leves sobre a súa parella.
A condena impona a sección cuarta da Audiencia Provincial de Pontevedra, nunha sentenza que non é firme, xa que é recorrible ante o TSXG.
A mesma sentenza tamén o absolve do delito de malos tratos habituais no ámbito da violencia sobre a muller polo que tamén estaba acusado.
Os maxistrados explican na sentenza que o investigado mantivo unha relación sentimental coa vítima durante un ano, tempo no que se produciron varios episodios de violencia.
Nun dos episodios, propinoulle diversas patadas e puñadas polo corpo e obrigouna a manter relacións sexuais contra a súa vontade. Actuou, segundo os maxistrados, "desde unha posición dominante como home".
Noutro deses episodios, agrediuna, golpeouna e logo expulsouna do seu propio piso vestida unicamente cunha camiseta.
Impediulle a entrada á vivenda e a muller tivo que pedir auxilio a unha veciña, que lle prestou o teléfono para chamar á policía.
O tribunal fundamenta a súa resolución principalmente na declaración da vítima, que considera "coherente e persistente".
Ademais considera que o relato da vítima está reforzado polas declaracións das testemuñas e dos axentes policiais, que confirman o estado da muller e as circunstancias posteriores ás agresións.