A Consellería do Mar pon a disposición das confrarías de pescadores da ría de Pontevedra os áridos de maior calidade ambiental que se van extraer coas obras de dragaxe do Lérez para a rexeneración dos bancos marisqueiros da contorna.
A directora xeral de Desenvolvemento Pesqueiro, Marta Villaverde, e o presidente de Portos de Galicia, José Antonio Álvarez, mantiveron este venres unha reunión de traballo co presidente da Federación provincial de confrarías de pescadores de Pontevedra e os patróns maiores de Lourizán, Raxó e Pontevedra para expoñerlles esta posibilidade.
Os representantes do Executivo autonómico estiveron acompañados polo persoal técnico da Consellería, concretamente enxeñeiros de Portos e biólogos, que expuxeron as posibilidades de aproveitamento dos materiais de categoría A, a de maior calidade ambiental, e os seus posibles usos en beneficio dos recursos marisqueiros.
Unha vez informadas todas as entidades beneficiarias da dragaxe corresponderalles a elas decidir sobre o aproveitamento dos áridos.
O excedente en todo caso será depositado en altamar no punto que debe autorizar o Ministerio de Transición Ecolóxica.
Con esta xestión, a Xunta de Galicia axiliza a tramitación previa das obras de dragaxe do Lérez dentro das súas competencias, á espera de que o Ministerio determine o punto de vertido dos áridos en altamar.
O punto tradicionalmente empregado e previsto para esta actuación, o punto E8, no exterior de Sálvora, foi suspendido hai 4 anos polo Ministerio de Transición Ecolóxica, organismo ambiental competente, paralizando con esta decisión 16 actuacións de dragaxe nas Rías Baixas, entre elas a do Lérez.
Pese a esta decisión, o recente informe do CEDEX, organismo técnico de alto prestixio dependente do propio Ministerio informou a principios deste mes de abril de que dito punto debe ser considerado "alternativa prioritaria" para o depósito de áridos de dragaxes.
Dito informe foi remitido ao Ministerio para que en exercicio da súa competencia estableza o punto de vertido que a Xunta debe empregar para dragar o Lérez, unha obra que conta xa con consignación orzamentaria de 3 millóns de euros por parte de Portos de Galicia.