Galicia detectou 134 novos positivos nas últimas 24 horas, segundo os datos da Consellería de Sanidade. Trátase de 11 contaxios diarios máis en relación aos cuantificados este venres 12 e 49 máis que o sábado da semana pasada.
O número de casos activos en todas as áreas sanitarias da comunidade autónoma continúa en ascenso con estes datos: A Coruña-Cee: 277 (+19); Ourense: 271 (+12); Vigo: 160 (+14); Lugo: 101 (+16); Santiago-O Barbanza: 94 (+9): Ferrol: 87 (+5) e Pontevedra-O Salnés: 87 (+9).
Trátase de 1077 casos activos, 84 máis que na xornada do venres. Destes pacientes, 49 atópanse hospitalizados en centros da comunidade, un máis que durante o día 12, a eles hai que sumar 12 persoas que se manteñen nas Unidades de Críticos, un máis que o venres.
Na área sanitaria de Pontevedra-O Salnés, as probas PCR detectaron 13 novos positivos nas últimas 24 horas. Todos os casos activos recupéranse nos seus domicilios e non hai enfermos ingresados por esta enfermidade nos hospitais da zona.
Nos últimos días non se rexistraron falecidos en Galicia. Desta maneira, o número de vítimas desde que se notifican as mortes provocadas pola pandemia establécese en 2.655 persoas, das que 205 corresponden á área de Pontevedra-O Salnés.
As autoridades sanitarias insisten na necesidade de manter as medidas de distancia de seguridade e o uso de máscara en espazos pechados para evitar a expansión do virus.