O comité de empresa de Ence Pontevedra convoca unha folga de 24 horas para o vindeiro xoves 30 de xaneiro na factoría de Lourizán, ante "a absoluta falta de comunicación e vontade negociadora" por parte da dirección da empresa.
Desde o comité piden ao persoal da fábrica que se sofren algunha presión ou coacción dende a empresa para exercer o dereito a folga, que se poñan en contacto cos representantes sindicais ou directamente cos integrantes do comité.
Esta convocatoria chega despois do ultimato presentado o pasado 15 de xaneiro, no que os representantes dos traballadores advertían dunha situación "insostible" en materia de seguridade laboral, xestión de persoal e investimentos nas instalacións.
O conflito laboral, que se arrastra desde hai meses, acumula máis de trinta denuncias ante a Inspección de Traballo.
Os sindicatos, con maioría de CCOO (sete delegados) e tres delegados cada un de CIG e UGT, denuncian o deterioro das instalacións e a falta de investimentos reais na factoría.
Entre as principais demandas destacan a necesidade de mellorar a seguridade nas estruturas de formigón, a limpeza industrial e a renovación de instalacións obsoletas.
Tamén critican a alta rotación do persoal eventual e a contratación "día a día" de traballadores novos.
Pola súa banda, a empresa defende a súa xestión alegando investimentos de 200 millóns de euros na última década e un proxecto de futuro, "Pontevedra Avanza", que prevé unha inversión de 120 millóns no período 2024-2028.
Ademais, destaca que o índice de accidentalidade está cinco veces por baixo da media do sector manufactureiro español.
O cadro de persoal, que conta con arredor de 250 traballadores, xa ratificara en asemblea o seu apoio á folga, coa posibilidade de estenderse a máis xornadas se continúa sen haber un achegamento ás súas demandas.
REACCIÓN DA EMPRESA
Desde a compañía reaccionaron a esta convocatoria sinalando que respectan o dereito de folga comunicada "polo Comité de Empresa da biofábrica de Pontevedra" e reitera a súa voación de diálogo.
Expoñen que, ao longo dos últimos dous meses, Ence reuníuse un total de 7 veces co seu comité de empresa, reunións cunha duración media de cinco horas, para dar resposta as súas inquedanzas.
Engade Pontevedra Viva como fonte preferida de Google de balde
Mantente informado coas últimas noticias de actualidade.