O coro da Xunqueira 1 pon en pé ao público do Pazo da Cultura coa súa actuación "feroz"

O Auditorio do Pazo da Cultura de Pontevedra encheuse este sábado de emoción e expectación. As 900 invitacións que o Concello puxo o pasdo luns a disposición do público para seguir a retransmisión da Gala dos Premios Feroz esgotáronse en apenas unhas horas, confirmando as ganas da cidade de vivir unha noite moi especial ligada ao cine e á cultura.

Desde o primeiro momento, o ambiente foi festivo e próximo. A cerimonia seguiuse en pantalla xigante entre aplausos, sorrisos e a sorpresa de recibir a visita dalgúns dos premiados, que compartiron os seus trofeos e dedicaron unhas palabras de agradecemento a un público entregado.

Moitos acudiron coa ilusión de ver brillar ás grandes estrelas do panorama cinematográfico nacional, pero a noite reservaba un protagonismo inesperado e profundamente emotivo. Quen realmente conquistaron ao auditorio foron os integrantes do Coro do instituto Xunqueira 1.

Sobre o escenario interpretaron o tema co que participaron na Gala, unha coidada adaptación do "No cambies" de Yurena, con arranxos do compositor Juanjo Rodal. A actuación desatou unha ovación longa e sentida, culminada con todo o público en pé, recoñecendo o talento e a paixón dun coro que leva xa dúas décadas deixando pegada.

Con vinte anos de traxectoria ás súas costas, os seus integrantes están afeitos renovarse, a participar en grandes citas e a viaxar por España e Europa. Pero noites como a deste sábado, arroupados pola súa cidade e emocionando a un auditorio cheo, quedan gravadas para sempre na memoria colectiva de Pontevedra.