'A cidade creativa. Onde vives, importa'. Así se presentaba a segunda xornada do ciclo de conferencias 'Urbtopías', que pretende reflexionar e debater sobre o futuro das cidades.
O concepto de cidade creativa e a cultura estiveron no centro do debate desenvolto este mércores na igrexa de Santa Clara, e na que baixo a moderación da xornalista cultural Marta Gómez interviñeron o decano da Facultade de Belas Artes, Xosé Manuel Buxán, a coordinadora da candidatura de Braga como Capital Portuguesa da Cultura, Joana Meneses, e a directora de Vinte, María Yáñez.
Buxán reflexionou sobre as maneiras tradicionais de afrontar a creatividade nos espazos públicos e na interacción da facultade que dirixe coa Boa Vila. Pola súa banda Joana Meneses expuxo o caso da súa cidade, Braga, como se xestiona o seu patrimonio, e falou da importancia das políticas públicas para estimular a creatividade. En canto á xornalista María Yáñez, centrou a súa intervención nos novos espazos culturais creados a partir da pandemia.
Tras esta cita, o vindeiro mércores 26 de abril será quenda para o acto central de 'Urbtopías', que servirá de homenaxe a un dos arquitectos máis prestixiosos do mundo, o danés Jan Gehl, e á súa idea de cidades suaves. Participarán os arquitectos internacionais David Sim e Onda Gustafsson, a arquitecta galega Teresa Táboas e o alcalde de Pontevedra, Miguel Anxo Fernández Lores, con Fernando González 'Gonzo' como moderador.
Engade Pontevedra Viva como fonte preferida de Google de balde
Mantente informado coas últimas noticias de actualidade.