O Partido Popular de Pontevedra alerta contra o que considera unha medida improvisada do goberno local do BNG que podería comprometer a seguridade cidadá durante a celebración do Multisport 2025.
Segundo denuncian os populares, os vehículos patrulla da Policía Local foron recolocados a 450 metros das dependencias policiais no Pazo da Cultura, mentres dura este evento deportivo.
A concelleira e senadora Pepa Pardo rexistrou unha solicitude de información no Concello para coñecer se existe algún informe técnico que avale esta decisión e como afectará o tempo de resposta policial ante posibles emerxencias.
"Esta medida retardará, como é lóxico e evidente, a pronta resposta policial ante calquera incidente ou actuación imprevista. Non se pode deixar desprotexida a nosa cidadanía", manifestou Pardo, quen esixe ao goberno municipal que busque "un lugar alternativo para os vehículos patrulla que garanta unha capacidade de reacción eficaz e inmediata".
A polémica pola recolocación dos coches policiais súmase a outras preocupacións en materia de seguridade que o PP vén denunciando na cidade. Neste contexto, Pardo tamén levou o asunto ao ámbito nacional, presentando unha moción na Comisión de Interior do Senado con varias esixencias para Pontevedra.
Entre elas destacan a creación urxente da Unidade de Prevención e Reacción (UPR) na cidade, a construción de novas comisarías tanto para a Policía Local como para a Nacional, e a elaboración dun Plan Nacional de Seguridade enfocado na loita contra a violencia de bandas xuvenís, tras os recentes incidentes con armas brancas ocorridos na praza de Barcelos.
"Lores toma decisións improvisadas que prexudican á Policía Local e que afectan á seguridade cidadá", afirma a concelleira popular, instando o alcalde a "exercer, dunha vez por todas, como rexedor de todos os pontevedreses e garantir a capacidade de reacción dos axentes municipais".
Engade Pontevedra Viva como fonte preferida de Google de balde
Mantente informado coas últimas noticias de actualidade.