O Servizo de Gardacostas de Galicia incautou 525 quilos de semente de mexillón e unha embarcación auxiliar na ría de Pontevedra.
A intervención, coordinada pola Consellería do Mar, tivo lugar nas proximidades da Illa de Onza, situada a 600 metros da Illa de Ons, durante un dispositivo de control da actividade extractiva.
No operativo participaron de xeito conxunto a Unidade Operativa de Pontevedra e a dos Servizos Centrais. Para os labores por mar, os axentes empregaron a patrulleira María Figueroa e a lancha auxiliar do buque Sebastián de Ocampo.
Durante a inspección, os efectivos detectaron a recollida de bivalvo fóra da normativa e levantaron unha acta de presunta infracción.
Ademais da semente, os gardacostas comisaron unha embarcación pertencente á cuarta lista e dez raspas, ferramentas utilizadas habitualmente para desprender a cría das rochas.
A mercadoría foi levada inicialmente á lonxa de Portonovo. Posteriormente, as autoridades entregaron o produto ao Instituto Galego de Formación en Acuicultura (Igafa), na Illa de Arousa, onde se destinará a labores de investigación e prácticas formativas do alumnado.
A Consellería do Mar indicou que a extracción e comercialización sen control afecta á sustentabilidade dos ecosistemas mariños e supón un risco para a saúde pública.
Esta práctica interfire tamén na actividade dos profesionais do sector que exercen o seu traballo baixo o marco legal vixente.