A Deputación de Pontevedra aprobará na Xunta de Goberno do vindeiro luns unha inxección económica de 135.000 euros para a reforma da zona dos vestiarios do polideportivo municipal.
Así o anunciou este martes o deputado provincial Ricardo Martínez nunha visita a esta instalación xunto co alcalde de Caldas de Reis, Jacobo Pérez.
Farase a través do II Plan Extraordinario de Infraestruturas Deportivas, no que Caldas recibirá este ano un 100% máis de recursos que na anterior edición.
En 2024 Caldas de Reis recibiu de preto de 70.000 euros para a mellora das gradas e da iluminación no campo de fútbol das Corticeiras.
Ricardo Martínez deu conta dos traballos que se realizarán con estes recursos, cos que se adecuarán os espazos correspondentes á área de vestiarios, que se atopan deteriorados.
Deste xeito, actualizarase o espazo ás actividades e servizos que actualmente se demandan e, aproveitando as obras, tamén se executarán uns aseos na área común.
As obras a levar a cabo serán interiores, consistentes en pintado e alicatado e instalacións de fontanería e electricidade, con novos paneis LED.