Tras quince días de campaña, os candidatos pontevedreses ás eleccións europeas empregaron a tradicional xornada de reflexión a descansar e pasar o día coas súas familias e amigos.
A maioría deles fíxoo nas súas localidades natais, entre eles o popular Francisco Millán Mon, que aproveitou para realizar un paseo polo centro de Pontevedra, onde tomou o aperitivo en compañía do seu irmán e a súa cuñada.
O outro candidato popular, Adrián Vázquez, que cuxas raíces familiares están en Lalín, optou por comer con interventores e apoderados do PP da Coruña para agradecerlles previamente o labor que realizarán durante a xornada electoral.
O socialista Nicolas González Casares, pola súa banda, estivo paseando por Lalín e o resto do día pasará o tempo coa súa familia, sobre todo co seu fillo nado durante esta campaña electoral, que xa foi o protagonista durante o paseo desta mañá.
O seu foi un "día normal por Lalín, de fin de semana, gozando da familia" e tomando algo cos amigos, despois de ir á presentación dun libro e, xa pola tarde, fixo un pouco de deporte ao ir correr pola Fraga de Catasós.
A candidata do BNG, Ana Miranda, escolleu pasar a mañá en Vigo, no barrio de Bouzas, xunto coa súa filla, amigos e veciños. Despois, pola tarde, achegouse ata Cuntis a visitar o cemiterio onde están enterrados os seus pais.
Miranda fixo un chamamento á participación nas eleccións europeas nas que "é moi importante ir votar porque decídense cousas para comer, que producir, onde vivir, como comunicarnos co resto do mundo e tamén decídese paz ou guerra".