Este domingo, ás 12.00 horas, Campelo acolle o tradicional desfile que marcará o inicio dunha programación ampla de Entroido, participativa e chea de cor que se estenderá ata o vindeiro 19 de marzo por todas as parroquias do municipio.
A comitiva partirá da biblioteca municipal para rematar na Praza da Granxa nun percorrido no que non faltarán música, coreografías e moita retranca.
Xunto ás comparsas locais (Grupo de Carnaval Samieira, As Sonecas, Os Canecos e Os 100Tolos) desfilarán formacións chegadas de diferentes puntos da provincia e de Galicia, como Alegría de Bora, Os Miúdos, Os Retrincos, Politicamente Incorrectos e Os Paparrulos.
Ao seu carón, grupos, parellas e participantes individuais competirán no concurso de disfraces, que repartirá un total de 4.820 euros en premios. A xornada culminará coa entrega de galardóns e animación musical a cargo de Due Eventos, poñendo o broche a unha festa que promete espectáculo e diversión para todos os públicos.
Os premios abranguen categorías infantil (ata 14 anos) e adultos, tanto en modalidade individual como en parella e grupo.
No apartado de adultos, os galardóns individuais irán dos 170 euros do primeiro premio aos 50 do cuarto; en parellas, o máximo será de 210 euros; e nos grupos, o primeiro posto acadará os 500 euros. No caso da categoría infantil, os premios individuais oscilarán entre 120 e 70 euros; en parellas, ata 160 euros; e en grupos, 250 euros para os gañadores.
Ademais, outorgaranse mencións especiais á mellor animación e aos choqueiros, compatibles co resto de categorías e dotadas con ata 200 euros.
As persoas que desexen participar de xeito individual ou en parella poderán inscribirse o mesmo día do desfile, entre as 9.30 e as 11.00 horas, nas inmediacións da biblioteca municipal, achegando copia do DNI (e no caso de menores, tamén da persoa titora). As asociacións deberán presentar copia do CIF e do DNI da persoa representante.
Pola súa banda, as comparsas deberán estar no punto de encontro unha hora antes da saída, accedendo pola PO-308, Avenida de San Xoán, polo Casal, onde se repartirán os dorsais.
O Concello habilitará aparcadoiros disuasorios debidamente sinalizados e, no caso de previsión de choiva, agardará ata a véspera para decidir un posible aprazamento.
A festa non rematará en Campelo. O venres 27 celebrarase na Seca a terceira edición da Pasarela de Entroido, que reunirá doce comparsas e rematará cunha gran festa amenizada por Dolce Vita.
O sábado 28 será a quenda do tradicional Enterro do Galo Fodorico na Praza do Mosteiro, seguido da Festa Choqueira organizada pola ACV Ronsel, con premios, chocolate quente e a actuación do Dúo Estelar.
Ao longo das semanas seguintes, outras citas sinaladas serán o Enterro do Mexillón en Combarro (18 de febreiro), o Enterro do Berberecho en Lourido (1 de marzo), o desfile e enterro do Galo Bruxo en Samieira (14 de marzo) e o Enterro da Galiña Vilarica en Vilariño (19 de marzo).
Música, disfraces, sátira e moita creatividade darán forma a un Entroido que medra cada ano en participación.
O Concello anima á veciñanza e ás persoas visitantes a saír á rúa e formar parte dunha celebración pensada para todas as idades.
Engade Pontevedra Viva como fonte preferida de Google de balde
Mantente informado coas últimas noticias de actualidade.