Roubaba a quen debía coidar. Iso facía, segundo a Policía Nacional de Pontevedra, unha muller que traballaba coidando a persoas con alto grao de dependencia nos seus domicilios e acaba de ser detida.
Acúsana de roubar numerosas xoias valoradas en máis de 10.000 euros nas vivendas nas que traballaba.
Segundo a información policial facilitada, aproveitaba que tiña acceso ás habitacións desas persoas ás que coidaba, pois son pacientes moi vulnerables e con alto grao de dependencia ás que atendía directamente no seu domicilio.
Unha vez nas habitacións, subtraía pulseiras, cadeas, pendentes, broches e colgantes de ouro, algunhas delas de gran valor.
A continuación, vendía as xoias en diferentes establecementos de compra-venda de ouro de Pontevedra. Fixo ata 16 vendas.
A súa actuación destapouna a irmá dunha das vítimas, que descubriu que lle faltaban xoias e denunciou.
A partir de aí, a Policía Nacional abriu unha investigación e logrou identificar e localizar á presunta autora e detela por un delito de furto continuado.
Até agora, os axentes localizaron a catro vítimas especialmente vulnerables, aínda que a investigación continúa aberta, pendente de localizar novas vítimas.
O grupo de investigación da Policía Nacional recuperou gran cantidade de xoias, que as vítimas recoñeceron como súas e puideron recuperalas.