Oito días despois, a fuga terminou. O home que o pasado 15 de outubro protagonizou unha perigosa fuga e persecución policial cun coche roubado por Poio e Pontevedra foi detido este xoves 23 en Redondela.
Foi detido tras protagonizar outra espectacular persecución policial, neste caso, en Redondela.
Fontes oficiais da Policía Nacional de Vigo-Redondela confirmaron a detención dun home, aínda que non concretaron que se trata do mesmo de Poio. Outras fontes consultadas si o confirmaron.
O home fuxiu pola mañá da Policía Local de Redondela e pola tarde foi detido pola Policía Nacional polo delito de roubo de uso de vehículo. En concreto, de dous vehículos.
A Policia Nacional de Redondela logrou recuperar dous vehículos que, segundo diversas fontes, tiñan placas portuguesas.
Tras a súa detención, xa foi posto a disposición xudicial.
En Poio, o coche fora roubado dúas semanas antes na Porteliña e, tras a persecución, o condutor deixouno abandonado. Non ten carné de conducir.
Houbo un amplo operativo de procura das policías locais de Pontevedra e Poio e da Garda Civil e horas máis tarde, puido recuperalo a Policía Nacional de Pontevedra.
O sospeitoso é un mozo de 35 anos de nacionalidade marroquí que vivía de okupa nun inmoble de Poio e na actualidade ten domicilio descoñecido.
É "unha persoa moi perigosa con antecedentes de todo tipo" e xa lle consta unha detención por condución temeraria en Poio hai uns anos, segundo informou a Policía Local de Poio
A Policía Local indica que parten da hipótese de que este home está relacionado con outros roubos, ademais do vehículo co que fuxiu.