A Policía Nacional localizou na cidade de Pontevedra o vehículo que este mércores protagonizou unha perigosa fuga e persecución policial desde Poio.
O coche fora roubado hai dúas semanas na Porteliña e, tras a persecución, o condutor deixouno abandonado e foi recuperado pola Policía.
No caso do condutor, está plenamente identificado, pero aínda non foi localizado. Trátase dun mozo de 35 anos de nacionalidade marroquí que vivía de okupa nun inmoble de Poio.
Segundo informou a Policía Local de Poio, na actualidade ten domicilio descoñecido. É "unha persoa moi perigosa con antecedentes de todo tipo" e xa lle consta unha detención por condución temeraria en Poio hai uns anos.
A Policía Local indica que parten da hipótese de que este home está relacionado con outros roubos, ademais do vehículo co que fuxiu.
De momento, por estes feitos, están a instruírse dilixencias por tres delitos: roubo de vehículo, condución temeraria con concreto perigo para os viandantes e condución sen permiso.
A persecución comezou en Poio pasadas as 12.30 horas de deste mércores. Comezou cando a Policía Local de Poio viu a esta persoa que circulaba cun vehículo roubado. Ía no coche cunha muller.
Déronlle alto, pero negouse a parar e iniciouse unha persecución cara á zona de Fragamoreira. De aí foi cara a Campañó e a zona da Ponte das Cabras, xa en Pontevedra. Neste punto meteuse pola zona de terra, percorrida habitualmente por peregrinos.
Xerouse "perigo con temeridade manifesta para os peregrinos" e tamén para varias persoas. Finalmente, escapouse da patrulla pola elevada velocidade á que circulaba e o perigo que existía coa presenza de peregrinos na vía.
Na procura participan as policías locais de Poio e Pontevedra e a Garda Civil.