Tres persoas, todas elas veciñas do Grove, foron detidas pola Garda Civil como presuntos autores de varios roubos rexistrados en datas recentes en domicilios e locais de hostalaría.
"Os detidos son persoas ben coñecidas policialmente", asegurou este venres o subdelegado do Goberno, Abel Losada.
"Quero felicitar expresamente á Garda Civil por esta operación, denominada 'Carretilla', e que supuxo a resolución deste problema puntual con prontitude e eficacia non só identificando e detendo os autores senón recuperando boa parte dos efectos substraídos", explicou.
En concreto este tres veciños do Grove, maiores de idade e con antecedentes policiais, foron detidos como presuntos autores de roubos con violencia en domicilios e pertenza grupo criminal.
Ademais outras dúas persoas están a ser investigadas por receptación e cooperación necesaria.
Segundo explica a Garda Civil, axentes do cuartel do Grove despregaron coa colaboración da Policía Local diversas actividades operativas para tentar localizar os responsables dos numerosos roubos producidos en vivendas e establecementos en datas recentes, e que xeraran alarma social.
O visionado das cámaras de seguridade dunha vivenda, onde puideron identificar un dos autores, resultou clave para acelerar as investigacións, situando seguidamente os domicilios dos demais compoñentes do grupo e procedendo á súa detención.
Un deles, engaden, fora detido recentemente como presunto autor dun delito continuado de roubo con violencia, por roubo de bolsos a persoas de avanzada idade usando o método do tirón.
Os detidos pasarán a disposición do Xulgado de Garda de Cambados.