Sete rapazas e tres rapaces, de 9 a 11 anos, procedentes da cidade ucraína de Pervomaiske, chegan este sábado ao campamento de verán do Centro Príncipe Felipe onde pasarán un mes de vacacións.
Este é o primeiro dos dous campamentos de verán, un en xullo e outro en agosto, que a Deputación de Pontevedra pon en marcha ao abeiro da iniciativa do Comité Europeo das Rexións e a Asociación de Cidades de Ucraína, encabezada polo alcalde de Kíiv, Vitali Klichkó, e liderada en España pola Federación Española de Municipios e Provincias (FEMP).
Os campamentos teñen o obxectivo de apoiar os menores que están a sufrir as consecuencias da guerra.
Este primeiro grupo de rapaces, que vén acompañado dun adulto experto en traballo social, residirá nun espazo dentro do Centro Príncipe Felipe preparado para que teñan todas as comodidades dun fogar convencional. Contarán con servizo médico, atención psicolóxica e un servizo de tradución e prevese que neste mes de estancia poidan coñecer a cultura e o territorio da provincia de Pontevedra.
Ao longo das catro semanas, visitarán Pontevedra, A Lanzada, Lapamán, Cabo Home, Combarro ou as cidades de Vigo e Santiago de Compostela, amais da participación noutras iniciativas de ocio e benestar que desenvolverán nas propias instalacións de Príncipe Felipe.