Para poder ofrecer unha solución definitiva ás recorrentes inundacións que se rexistran en Fernando Olmedo, o Partido Popular entende que o Concello debe "implicarse directamente" nas actuacións que proxecta a Xunta de Galicia.
Augas de Galicia executará unha zona de inundación controlada en Valdecorvos, emendará o problema do encanamento da canle entre José Malvar e Casimiro Gómez e realizará tamén as actuacións de mellora na canalización do río.
"Todas as obras respecto ao río Valdecorvos corresponden á Xunta de Galicia, que ten un compromiso firme cos veciños para poder materializalas", asegurou o portavoz popular, Rafa Domínguez.
Pero o dirixente popular advertiu de que as actuacións de competencia exclusivamente autonómica "non serán suficientes" para erradicar definitivamente este problema, polo que instou ao Concello a asumir as súas responsabilidades.
Para o líder popular, nos seus 27 anos como alcalde "Lores non soubo ou non quixo facer nada" para paliar as inundacións que se producen de forma cada vez máis frecuente e intensa en todo este ámbito urbano.
Alertou de que un dos colectores municipais que atravesa o CGTD para evacuar a auga cara ao río Lérez está "absolutamente inutilizado", o que reduce á metade a capacidade de evacuación e agrava o risco de inundacións.
Por iso é polo que Domínguez sosteña que o Concello debe construír dous novos colectores, en José Malvar e Pai Gaite, e completar a renovación do saneamento na zona, que está "nun estado pésimo" por falta de mantemento.
Así o reclamarán nunha moción que presentarán no próximo pleno municipal, ao entender que o executivo local debe implicarse "da mesma forma" que a Xunta.
O colector de José Malvar, indicou o líder do PP pontevedrés, serviría para retirar unha "parte moi importante" da auga que atravesa o barrio e levala directa ao río.
O de Pai Gaite, pola súa banda, resolvería o "tapón" que se produce ao sumar a auga que chega desde Barcelos e Santa Clara e que agrava o risco de inundacións.
Estas seis actuacións, tres da Xunta e tres do Concello, garantirían, segundo as simulacións realizadas por Augas de Galicia, "que non houbese inundacións na zona".
"Son obras complexas e difíciles. Non dubido que terán o seu peso económico, pero debemos facelas para facer xustiza cos veciños", sentenciou Rafa Domínguez.