Cinco sendas de 16,7 quilómetros de lonxitude e que contarán cun investimento de 8,7 millóns de euros. Son os grandes datos do Plan de Sendas de Galicia para a comarca do Salnés, que foi presentado este martes pola conselleira de Infraestruturas e Vivenda, Ethel Vázquez.
O goberno galego prevé ter redactados os proxectos no verán, para proceder á licitación das obras a medida que se vaian recibindo. Así, destacou a conselleira, os veciños destes concellos terán sendas "seguras, sostibles e integradas na paisaxe" para realizar os seus itinerarios habituais.
Nunha primeira fase, executaranse dúas sendas que se van facer na PO-308. Por un lado, a senda entre Covelo e Raxó, moi demandada polos veciños da zona, e que permitirá facer este itinerario a pé dun xeito seguro; e a que vai de Portonovo á Lanzada, de preto de 9 quilómetros, que se desenvolverá en distintas fases, a primeira delas xa adxudicada.
Ethel Vázquez sinalou que estes itinerarios habilitaranse para peóns e ciclistas e suporán unha "importante mellora" na seguridade viaria, o que incidirá positivamente na economía local, "xa que significará un forte pulo para o turismo da zona, e redundará tamén nunha mellora do medio ambiente".
Outra das sendas que se habilitarán no Salnés será na PO-306, entre Vilanova de Arousa e a ponte da Illa de Arousa, na que xa comezaron as obras. Ambos concellos tamén estarán unidos por outro traxecto entre Deiro e a ponte da Illa de Arousa.
A quinta das sendas previstas será a que una Vilariño e o Polígono do Salnés, entre Cambados e Ribadumia.
A responsable de Infraestruturas do goberno galego subliñou que "xa estamos a traballar nos proxectos", polo que nas vindeiras datas os técnicos contactarán cos alcaldes ou cos concelleiros dos distintos municipios para concretar os proxectos das sendas e avanzar nos detalles técnicos.