O próximo 12 de xullo, Vilaboa repetirá unha cita que xe volveu imprescindible cada verán, o Encontro de Entroidos, que chega á sétima edición.
Trátase dunha xornada completa de música, tradición e diversión para todos os públicos entre as 13:00 horas e ben entrada a noite.
O programa abre ás 13.00 horas co tradicional Vermú de Entroidos no Chiringo de Deilán.
O encontro en si será a partir das 18:15 horas. A apertura correrá a cargo de Marci Varelae e ás 18:30 horas chegará o desfile e as actuacións dos entroidos, onde se poderá gozar dunha mostra da riqueza do patrimonio inmaterial galego e peninsular.
A festa continúa ás 21:00 horas coa Fanfarria Furruxa, que amenizará a cea co seu repertorio festivo.
Para os que queren estirar a noite, ás 23:00 horas comeza a 'Noite de Encontros', que contará coa actuación de Quinkillada e Boyanka Kostova, seguidas dos Dj's Encontro, con Dj Charlie e Dj Ekix aos mandos, garantindo que a música e a diversión se prolonguen hasta as tantas.
O evento tamén está pensado para os máis pequenos. Durante toda a tarde, desde as 18:00 até as 21:00 horas, haberá inchables.
A programación inclúe un mercadiño de artesanía onde se poderán adquirir produtos locais e pezas únicas, así como postos de merchandising do propio evento.
Unha das novidades desta edición é o concurso 'Entroidos Tradicionais', que repartirá premios en metálico entre os participantes, fomentando a participación e recoñecendo o esforzo dos grupos que manteñen vivas estas tradicións centenarias.
Desde o Concello de Vilaboa destacan que o Encontro de Entroidos represéntase como "un exemplo de como as tradicións poden adaptarse aos novos tempos sen perder a súa esencia".
A celebración en pleno verán permite achegar estas manifestacións culturais a un público máis amplo, incluíndo visitantes que durante o Entroido tradicional non poden desprazarse ata o municipio.