O Enterro da Sardiña faise esperar, pero non falla á súa cita en Portonovo

Nin a choiva puido acabar coa sardiña. Aínda que o chuvieiro obrigou a suspender o tradicional Enterro da Sardiña o pasado mércores de Cinza, Portonovo non estaba disposto a renunciar a un dos actos máis simbólicos do seu entroido.

Dez días despois da data prevista, e tras a multitudinaria "Festa do Jato" celebrada o día 21, a vila mariñeira despediu por fin o Entroido como manda a tradición.

A espera non restou solemnidade nin humor á cita. A comitiva fúnebre partiu desde a marquesiña de Portonovo entre esaxerados saloucos, plañideras entregadas ao seu papel e veciños que acompañaban á protagonista do duelo no seu último paseo. O cortexo avanzou por distintas rúas, sumando curiosos e cómplices a cada paso, até enfilar rumbo ao porto.

Foi alí, no recinto portuario, onde se escenificou o adeus definitivo. Entre queixumes teatrais e algun que outro sorriso inevitable, a sardiña ardeu poñendo o broche final a máis dunha semana de celebracións.

O acto estivo organizado pola Asociación Comisión de Festas San Cristóbal de Portonovo, en colaboración co Concello, que lograron rescatar a tradición e devolverlle o seu lugar no calendario festivo, aínda que esta vez con atraso. Porque en Portonovo, se o Entroido non pode despedirse cando toca, simplemente aprázase… pero nunca se cancela.