O Concello de Pontevedra organiza o martes 19 de novembro unha xornada medioambiental aberta á cidadanía na Casa das Campás, centrada nos retos da renaturalización urbana en Galicia.
O evento contará coa participación de expertos, representantes municipais e profesionais do urbanismo que analizarán solucións e boas prácticas para crear cidades máis verdes, humanas e sostibles.
A sesión, promovida a través do proxecto RedeVerde e co apoio da Fundación Biodiversidad do Ministerio para la Transición Ecológica y el Reto Demográfico, inclúe relatorios do arquitecto Valerio González Somoza sobre a cidade como ecosistema, e de Federica Risi da European Urban Knowledge Network, que presentará casos europeos de éxito.
Ademais, representantes dos concellos de Arteixo, Santiago de Compostela e A Coruña expoñerán as súas iniciativas para recuperar espazos naturais e promover barrios máis saudables.
A xornada celebrarase de 9:00 a 13:00 horas e rematará coa intervención do concelleiro de Medio Ambiente, Xaquín Moreda González, destacando o compromiso de Pontevedra co desenvolvemento urbano sostible.
A participación é gratuíta e só require inscrición previa a través do formulario habilitado polo Concello nesta ligazón.
Engade Pontevedra Viva como fonte preferida de Google de balde
Mantente informado coas últimas noticias de actualidade.