Rita, a muller de 79 anos atacada o pasado 2 de xaneiro polo seu fillo na súa casa de Santa María de Sacos, en Cerdedo-Cotobade, faleceu no hospital.
A muller levaba dúas semanas ingresada na UCI do Hospital Alvaro Cunqueiro de Vigo, moi grave polas feridas causadas polo seu fillo. Finalmente, non sobreviviu.
O seu fillo, de 46 anos, foi detido o 2 de xaneiro polo intento de asasinato da súa nai e permanece ingresado na área de Psiquiatría do complexo hospitalario de Pontevedra.
O home deulle unha brutal malleira a golpes e causoulle múltiples fracturas en distintas partes do corpo, como o cranio ou a zona costal.
Tras ser atendida na vivenda, o equipo médico decidiu o seu traslado en helicóptero a Vigo, onde estivo ingresada en estado crítico ata que faleceu.
En canto ao seu fillo, foi trasladado nun primeiro momento á Comandancia da Garda Civil de Pontevedra, aínda que logo recibiu atención médica e foi derivado á unidade de Psiquitaría do Hospital Provincial de Pontevedra.
Os feitos ocorreron sobre as 14:00 horas do pasado xoves 2 de xaneiro na vivenda familiar do lugar de Vila de Abaixo, na parroquia de Santa María de Sacos.
Unha veciña da vítima deu a voz de alarma a través do 112 tras atopar á muller tirada no chan.
Tras o ataque á súa nai, o agresor deuse á fuga e despois de percorrer os arredores da zona e parar en distintos puntos, regresou á casa familiar, onde xa estaban os servizos médicos, a Garda Civil e un grupo de veciños.
Segundo relatan fontes veciñais, falou con eles finxindo non saber nada e preguntoulles que ocorrera, pero como sospeitaban del, os veciños alertaron á Garda Civil.
Foi detido unha hora despois da malleira, sobre as 15:00 horas, como presunto autor dun delito de homicidio en grao de tentativa por agredir a golpes á súa proxenitora.
Agora, tras o falecemento da vítima cambiarase a cualificación da súa acusación.