Un mozo de 33 anos resultou ferido de gravidade este venres mentres traballaba no porto de Marín.
O sinistro rexistrouse a media mañá deste venres nas instalacións do estaleiro Nodosa, no porto marinense.
O mozo traballaba dentro dun barco cando caeu desde unha altura de dous metros.
Segundo a información facilitada pola Policía Nacional, o mozo escorregou por un oco e acabou no solo.
O traballador sufriu un traumatismo cranioencefálico e tamén unha fractura de cadeira.
Nun primeiro momento, foi trasladado ao Hospital Montecelo, aínda que fontes consultadas por este xornal indicaron que desde alí foi derivado ao Hospital Álvaro Cunqueiro de Vigo pola gravidade das feridas.
Ata o estaleiro se desprazaron efectivos da Policía Xudicial da Policía Nacional, que se encargará da investigación do ocorrido.
Tamén se achegaron a auxiliar efectivos do 061.