O Nadal chegou a Vilaboa a través de Figueirido.
É a primeira parroquia que pulsou o botón de aceso para a súa iluminación do Nadal, elaborada nas últimas semanas cun intenso traballo por parte da asociación veciñal.
Preto de 30 persoas implicáronse na decoración do Nadal, cuxo elemento central é unha singular árbore de 11 metros de altura elaborada con 144 palés e iluminado con 18.000 leds.
Un exemplo de creatividade, sustentabilidade e espírito comunitario que se converte en todo un punto de atracción en Vilaboa.
Para celebrar a chegada do Nadal, organizouse ademais un magosto popular con castañas de balde e música en directo.
Trineos, trens, árbores, un castelo, un portal de Belén e até unha nora son algúns dos elementos presentes este ano na creación artística de Nadal.
"Nun concello cun orzamento limitado sería imposible acadar unha ambientación desta magnitude sen o esforzo da veciñanza. A miña máis sincera felicitación a todas as persoas que fan posible este proxecto, que nos enche de orgullo como comunidade", sinalou o alcalde, César Poza, agradecendo a implicación cidadá.
Con esta iniciativa Figueirido converteuse na primeira parroquia de Vilaboa en acender o Nadal, á espera de que nos próximos días se sumen Cabadachán, Paredes, Santa Cristina, Igrexa de Vilaboa e o Alcouce.
Cabe destacar que este ano o Concello decidiu apostar por incrementar as axudas ás asociacións veciñais apoiando directamente o seu esforzo e implicación na decoración en lugar do tradicional concurso de iluminación.