Marín volveu a ser un dos grandes referentes da celebración do Samaín.
Logrouno cunha nova edición do Samaín Briz, que volveu a converter este espazo urbano nun auténtico parque do terror con actividades para todos os públicos.
Toda a leira transformouse nun aterrador escenario, cheo de sustos e diversión.
Estivo presidida por dous túneles do terror: "Hotel Terror Cañeiro", coordinado pola comparsa Os da Caña, e "O Taller Esquecido", a cargo do Club Deportivo La Peña.
Ademais, repartidas por todo o espazo ambientáronse catro estaciones de medo, de acceso libre para o público, nas que colaboraron, entre outros, a comparsa Val do Lérez, Cor Café e As Sonecas.
Foron o convento do terror, o manicomio da morte, a cova do asustador e un perigoso colexio cheo de criaturas estrañas.
A xornada completouse con espectáculos no lago central, ambientación musical e postos de comida e bebida para que os asistentes puidesen tomarse un respiro.
Para os máis pequenos da casa e para gozar en familia estivo habilitada tamén a zona do PequeSamaín, con pintacaras, xogos, animación ou baile.