A Garda Civil non descarta que se produzan novas detencións relacionadas co roubo duns 48.000 euros en viño de alta gama que sufriu Pepe Vieira no seu restaurante de Raxó.
Na operación xa hai dous detidos, ambos os dous ex traballadores do establecemento e que, segundo os investigadores, serían os autores materiais do roubo, e outros dous investigados, neste caso por recepcionar o viño roubado.
Estas catro persoas, segundo a Garda Civil, formarían parte dunha organización criminal que se dedicaba a roubos selectivos de alto nivel en restaurantes de luxo.
O líder desta organización sería un home que, actualmente, cumpre prisión por delitos de tráfico de drogas e que actuaba xunto a un home da súa máxima confianza.
Os investigadores sosteñen que o grupo operaba en dous niveis claramente diferenciados, por unha banda os autores materiais que executaron o roubo utilizando unha chave falsa e, por outro, os receptores finais de alto poder adquisitivo.
Os dous ex traballadores, de 24 e 19 anos, executaron o roubo "con alta profesionalidade", indica o instituto armado, tras acceder ao local mediante o método de chave falsa e cun coñecemento preciso das claves da alarma e das caixas fortes.
Entraron no restaurante de madrugada e apoderáronse de 9.000 euros en efectivo e de máis de sesenta botellas de viño de alto valor, moitas delas de venda exclusiva en restaurantes selectos como este, que ten dúas estrelas Michelin.
Os indicios obtidos polos axentes levounos directamente até o líder da banda.
En propiedades vinculados a el e o seu máximo colaborador, a Garda Civil interveu unha importante cantidade de botellas de viño, entre elas a práctica totalidade das roubadas no restaurante de Pepe Vieira.
As botellas subtraídas, moitas destas exclusivas, teñen un elevado valor económico e son únicas e pouco factibles de atopar no mercado tradicional.
A todos os implicados investígaselles por pertenza a organización criminal, aos que se suman os cargos de roubo con forza para os autores materiais e de receptación aos que tiñan o viño roubado no seu poder.