Todos os mércores á tardiña, durante os meses de xullo e agosto, a terraza de Bodegas Martín Códax, en Cambados, converterase nun escenario gastronómico único. Será cunha nova edición da singular proposta As Tardes do Atlántico.
Este ciclo, inspirado pola nova xeración de cociñeiros e cociñeiras que traballan desde a autenticidade, naceu coa vocación de dar visibilidade a cociñas con alma, comprometidas coa súa contorna e que entenden a gastronomía desde o próximo, o identitario e o sostible.
Xa consolidada como unha das citas imprescindibles do verán, As Tardes do Atlántico volverá fusionar viño, territorio e creatividade cun enfoque relaxado e contemporáneo, da man de nove dos restaurantes máis interesantes da cociña galega actual.
O ciclo comezará o 2 de xullo co chef Nel Parada, do restaurante Nordestada (Portosín), cuxa carta varía segundo o que ofrece o día: peixes de baixura, mariscos recentemente extraídos e vexetais da contorna nunha proposta que se coce sen présas e á calor da cociña de leña.
O 9 de xullo será a quenda de Ana Siñeriz e Quique Vázquez, responsables de Terreo (A Coruña), cuxa cociña combina sabores de aquí e de alá e flúe coa tempada, integrando influencias mediterráneas, francesas ou asiáticas nun espazo informal pero con moito fondo.
Antonio Novas, de Trasmallo (Pontevedra), tomará o relevo o 16 de xullo. Fillo de familia mariñeira, rende homenaxe á súa tradición pondo o foco nos peixes menos valorados, as receitas do recordo e as técnicas que devolven ao produto o seu máximo esplendor.
Pola súa banda, o 23 de xullo cociñará Víctor Basante, de Arrueiro (Laxe), un restaurante que ofrece un menú de seis pases que cambia constantemente segundo a tempada, empregando unicamente produto local, técnicas contemporáneas e moita sensibilidade.
Xullo pecharano, o día 30, Alba Aguiar e Alexandre Falcón, do restaurante D'Leria (Carril), unha das propostas máis singulares da ría de Arousa, onde exploran o mar, a terra e a memoria con técnica, creatividade e un gran respecto ao produto.
Arón Álvarez de Os Maristas (Pontevedra) será o protagonista o 6 de agosto, mostrando o traballo que fai a diario co produto dispoñible cada día e que interpreta cunha cociña directa, sen artificios, na que importa máis a esencia que a forma.
O 13 de agosto, tras os fogóns estará Inma López, de Beldade (Tui), que achega a súa visión da cociña creativa e de mercado a cada prato, utilizando ingredientes de primeira, e apostando polo mellor de cada tempada cun toque atrevido e distintivo.
Xa o 20 de agosto tocaralle cociñar a Pablo Liste, responsable de Albanta (Vilaboa), un cociñeiro que aposta pola inmediatez e o lume. Na súa cociña non hai trampa nin cartón: todos os pratos pasan pola brasa e elabóranse á vista do comensal.
O ciclo concluirá, o 27 de agosto, con Elisabet Castro e Manuel Fernández do Mesón do Campo (Vilalba), un restaurante familiar segue fiel á súa orixe: unha cociña galega de produto rural, capón, carne de caza ou cogomelos e onde cada prato conta unha historia.
Todos os cociñeiros participantes, desde proxectos emerxentes que reivindican unha nova forma de facer até propostas xa consolidadas que seguen evolucionando cunha mirada innovadora pero sempre fieis á súa orixe, cociñarán con produtos locais.
Serán propostas gastronómicas pensadas en exclusiva para a ocasión, que se harmonizan cos distintos albariños de Bodegas Martín Códax: viños nados no corazón do Val do Salnés e cultivados co máximo respecto pola contorna.
As Tardes do Atlántico, ademais, é moito máis que unha experiencia enogastronómica ao ser unha aposta por un modelo de enoturismo consciente e transformador, que pon en valor a paisaxe, a identidade cultural e o traballo de quen coidan e defenden o seu territorio cada día.
Así, en cada sesión, o público terá a oportunidade non só de saborear pratos únicos, senón tamén de coñecer de cerca aos cociñeiros e cociñeiras que os asinan, compartir con eles o seu proceso creativo, a súa historia e o seu compromiso.
As entradas, que serán limitadas, estarán dispoñibles cada xoves a partir do 26 de xuño ás 12:00 horas en www.ticketrona.com.