A Xunta de Goberno do Concello de Pontevedra aprobou a segunda prórroga, a última, do contrato de Mantemento dos Espazos Públicos Urbanos ata o 23 de agosto de 2026.
O contrato fora adxudicado en 2022 á empresa Elsamex por un montante de 726.000 euros anuais.
Segundo informou o alcalde de Pontevedra, Miguel Anxo Fernández Lores, "haberá que sacar outro contrato para o ano que vén".
Esta actividade céntrase en manter no mellor estado posible os espazos públicos urbanos a través do coidado de mobiliario, pintado, pavimentos e outras estruturas singulares.
A intensidade do uso e as actividades habituais na rúa provocan a necesidade de ampliar os esforzos para manter e mellorar o estándar de calidade.
A empresa garante a presenza de tres brigadas con carácter permanente na rúa e un equipo de retén. Abordan traballos de carpintaría, ferraxaría e tratamento de metal, pintados, vernizados, atención de estruturas singulares como muros, peches e pontes.
A estes grupos de traballo súmanse, por outra banda, as actividades que tamén desenvolven as brigadas municipais.
A empresa Elsamex dedícase principalmente ao tratamento preventivo e correctivo nos espazos públicos tentando evitar que se rexistren incidencias, ao mesmo tempo deberán atender casos inusuais. Pola súa banda, as brigadas municipais encargaranse das emerxencias e das actividades que requiran inmediatez.
MANTEMENTO DOS COLEXIOS
Nesta mesma Xunta de Goberno aprobáronse outros dous contratos para os labores de mantemento dos colexios públicos da cidade (Educación infantil, Primaria e Gardarías).
Son obras que competen ao Concello de Pontevedra e que se adoitan acometer nos períodos non lectivos como son as vacacións de verán.
Trátase de dous lotes, por 100.000 euros cada un. O primeiro corresponde á zona Sur e foi adxudicado á empresa GPD e o outro lote é para os centros educativos da zona norte que asume Naturgalia.