Volveu pasar. Xusto pasado un mes do último vehículo que quedou "atrapado" nas escaleiras que conectan a Praza de Ourense coa Ferrería, a escena repetiuse para sorpresa, e xa case tradición, dos viandantes.
Nesta ocasión, a protagonista foi unha moza condutora estranxeira que seguiu fielmente as indicacións do seu GPS… se cadra, demasiado.
O navegador conduciuna ata un punto onde o asfalto se converte, sen previo aviso, en chanzos. E alí quedou o coche, colgado e desconcertado, coma se dubidase do seguinte movemento.
A intensa choiva que caía sobre Pontevedra tampouco axudou. Segundo explicou a condutora, a falta de visibilidade impediu que detectara a tempo o inesperado "final de ruta".
Mentres esperaban a chegada do guindastre, unha patrulla da Policía Nacional recollía o testemuño en inglés, nunha escena tan tranquila como curiosa.
Non faltaron tampouco os espontáneos conselleiros. Algún viandante, entre bromas, animaba a arrincar e avanzar "amodiño, que seguro que non pasa nada".
A anécdota repítese con certa frecuencia na Boa Vila e sempre cos mesmos ingredientes: condutores que non coñecen a cidade e un GPS demasiado optimista. Unha combinación que, unha vez máis, converteu as escaleiras da Ferrería nun inesperado punto negro e nunha historia máis para o anecdotario urbano.