Chega unha nova edición de 'Novas Sendas' cun programa socio-formativo en Soutomaior que foi presentado polo alcalde, Manu Lourenzo, e a concelleira de Mocidade, Rosana Martínez Boullosa, como unha ferramenta clave para fomentar a autonomía a través da aprendizaxe permanente e a mellora da empregabilidade.
A gran novidade desta convocatoria radica na súa forte aposta pola vangarda tecnolóxica. Aínda que o programa mantén a súa esencia multidisciplinar, nesta ocasión a Intelixencia Artificial (IA) eríxese como o fío condutor de gran parte da oferta.
A intención do goberno local é que a veciñanza non só coñeza esta nova tecnoloxía, senón que aprenda a dominala como unha aliada para optimizar o esforzo na creación de contidos, facilitar a procura de emprego ou dar un impulso competitivo aos negocios locais.
O proxecto, segundo o goberno local, fuxe de nichos pechados e busca chegar a todos os perfís de idade do municipio.
Para os máis novos e o sector profesional, inclúense obradoiros de competencias dixitais avanzadas, ciberseguridade práctica e creación de marca dixital.
Pola súa banda, os maiores contan con propostas específicas de iniciación, como o curso para converter o teléfono móbil nunha "ventana ao mundo" ou programas de autonomía para a realización de trámites en liña.
Entre as propostas figuran cursos de escaparatismo, manipulación de alimentos, aplicación de produtos fitosanitarios (nivel básico) e manexo de carretas elevadoras, cubrindo así un amplo espectro de necesidades de capacitación para o mercado de traballo actual.
O Concello deseñou este programa para que se desenvolva de xeito intensivo entre os meses de febreiro e xuño.
As persoas interesadas en participar deberán estar atentas, xa que o prazo de matrícula ábrese o vindeiro luns, 26 de xaneiro, ás 9:30 horas.
Para axilizar o proceso e garantir a accesibilidade, a inscrición realizarase exclusivamente de xeito telemático a través do portal oficial de actividades do Concello (https://soutomaior.gal/actividades/).