Axentes da Policía local de Poio identificaban un home na parroquia de San Xoán durante a xornada do venres 27 de maio con pezas falsificadas, que utilizaba para distribuír e comercializar de maneira ambulante polo municipio.
No momento en que foi identificado, o home portaba un total de 64 pezas: gorras, camisetas e roupa interior de marcas como Nike, Adidas ou Calvin Klein, todas elas falsificadas, sen que os titulares dos dereitos da propiedade industrial rexistrados conforme á lexislación de marcas autoricen a distribución. Segundo indican desde a Policía Local de Poio, estas pezas carecen das correspondentes medidas de seguridada e calidade esixidas.
Os axentes instruíron as dilixencias ao xulgado ao entender que o home é presunto autor dun delito contra a propiedade industrial, de pezas falsificadas co logotipo e firmas de marcas rexistradas. Este delito castígase cunha pena de prisión de seis meses a dous anos, ou cunha multa de entre un e seis meses de traballos en beneficio da comunidade de 31 a 60 días.