A praia da Area da Secada, un dos arenais con bandeira azul máis concorridos da Illa de Arousa, estreaba este luns 15 de xuño un sistema de estacionamento regulado.
O Concello puxo en marcha a primeira Ordenanza Reguladora de Aparcamento (ORA) na estrada que vai desde o Instituto Galego de Formación en Acuicultura (Igafa) ata a citada praia.
A medida, que afecta a unhas 300 prazas, estará operativa todos os días de 10:00 a 20:00 horas, e estenderase ata o 15 de setembro.
O servizo establece unhas tarifas que comezan nos 0,50 euros por unha hora de estancia. Deixar o coche dúas horas custa 1 euro; tres horas supoñen 2 euros e catro horas elévanse aos 3 euros. Para as estancias prolongadas, a tarifa por pasar o día completo no areal sitúase en 4,50 euros.
Os usuarios teñen a opción de realizar o pago de xeito directo a través dos tres parquímetros instalados na zona ou mediante a aplicación móbil Telpark, que emite avisos antes de que remate o tempo abonado.
O novo regulamento recolle que os vehículos empadroados no municipio da Illa de Arousa non teñen que pagar por estacionar nestas prazas. Esta exención aplícase tamén ás motocicletas, aos vehículos oficiais, aos que realizan tarefas de carga e descarga e aos de persoas con mobilidade reducida que conten coa correspondente autorización.
A Policía Local encárgase de supervisar o cumprimento dos horarios e tarifas a través dun sistema PDA de identificación de matrículas.
O regulamento fixa unha sanción de 30 euros para os condutores que aparquen sen o comprobante ou que superen o tempo permitido, cunha redución do 50 % (15 euros) se se paga no propio parquímetro nun prazo máximo de 24 horas. Por outra banda, a manipulación do título de estacionamento penalízase cunha multa de 60 euros.
Luis Arosa, alcalde da Illa de Arousa, xustifica a iniciativa para distribuír de xeito máis equitativo os espazos de aparcamento ante a gran afluencia de condutores no verán. O rexedor sinalou que os ingresos obtidos servirán para axudar a sufragar os custos económicos derivados do incremento de servizos que asume a administración local coa chegada de visitantes durante estes meses do ano.