A patrulla fiscal e de fronteiras da Garda Civil de Pontevedra retirou do mercado un total de 1.178 produtos dun bazar en Soutomaior que presentaban un risco potencial para a seguridade dos consumidores.
Os feitos ocorreron o pasado 7 de xullo nunha inspección fiscal rutineira no establecemento.
Entre o material incautado había aparellos electrónicos e coitelos de cociña que carecían de etiquetaxe legal e de responsable na Unión Europea, cuxo valor total ascende a máis de 24.000 euros.
Entre estas irregularidades destaca a falta dun operador ou responsable legal en territorio da Unión Europea, así como deficiencias na etiquetaxe obrigatoria, o cal non figuraba no idioma oficial español.
En total, o lote de material intervido inclúe 490 paneis solares, 315 focos de luz, 152 altofalantes, 74 lanternas, 65 cámaras de vídeo vixilancia, 52 luces de emerxencia V-16 para vehículos e 30 xogos de coitelos de cociña.
Todos estes artigos foron precintados e postos a disposición da autoridade competente en materia de consumo.
En canto ao responsable do negocio, trátase dun home de 42 anos e veciño do municipio que foi denunciado administrativamente por unha infracción grave.
Dede a Garda Civil explican que o motivo da actuación era verificar o cumprimento da normativa penal, fiscal e tributaria.
Ademais, buscaban detectar posibles produtos de contrabando, de orixe fraudulenta ou que incumprisen as medidas de seguridade esixidas na Unión Europea.
Engade Pontevedra Viva como fonte preferida de Google de balde
Mantente informado coas últimas noticias de actualidade.