Sen feridos pero con danos materiais significativos. Son as consecuencias do incendio que se rexistrou este mércores na sede do club moteiro Rebels MC Hispania, en Sanxenxo.
O lume, que se declarou sobre o seis da madrugada, calcinou parcialmente o local social desta asociación, situada nunha antiga discoteca de Noalla, preto da praia da Lanzada.
Ao lugar trasladáronse efectivos do servizo municipal de emerxencias de Sanxenxo, despois de que un particular alertase ao 112 Galicia ao ver o fume negro que saía das instalacións.
A rápida intervención dos corpos de emerxencias, entre os que estaban tamén bombeiros do parque comarcal de Ribadumia, logrou que o incendio non se propagase por toda a sede do club, afectando principalmente ao palco, á zona de barra e a un despacho.
Neste operativo tamén participaron membros do GES de Sanxenxo, axentes da Policía Local e a Garda Civil, que serán os encargados de investigar as causas deste incendio.
As primeiras análises advirten que os danos que provocou o fume nas instalacións tamén foron bastante importantes.