O alcalde en funcións de Ponte Caldelas, Perfecto Rodríguez, realizou o izado provisional da Bandeira Azul outorgada por ADEAC á primeira praia fluvial de España en conseguir este distintivo ambiental europeo, en presenza do Comité de Xestión encargado de velar polo perfecto cumprimento das normas de servizo e seguridade establecidas nas bases que rexen esta rigorosa concesión.
Os membros do Comité de Xestión, formado ademais de polo alcalde, o coordinador sociocultural do Concello, o concelleiro de obras e servizos, a axente de desenvolvemento local, un representante de Urbaser, o presidente da Sociedade de Caza e Pesca Verdeseixo, representante de COEMPO e Policía Local, supervisaron a marcha dos traballos para adecuar todo a área recreativa e a zona de baño da Calzada á normativa da Bandeira Azul.
Xa como se encontra instalado o aparcabicis, unha illa de recollida selectiva de residuos cun iglú de vídrio rotulado cunha fotografía paisaxística da praia fluvial, a caseta de socorrista, en madeira, con padiola e todos os elementos fundamentais para realizar labores de primeiros auxilios e reanimación, aseos adaptados para persoas con discapacidade e persoas de reducida mobilidade, o balizamento da zona de baño con boias visualizadoras para determinar a área sobre a que actuarán os 3 socorristas (2 simultáneamente sempre en activo) cos que contará a praia fluvial.
En canto aos 3 socorristas que prestarán os seus servizos, tal e como determina a concesión da Bandeira Azul, entre o 1 de xullo e o 31 de agosto, sinalar que se encontran en período de selección, a través da colaboración económica da Xunta, e cuxos candidatos son enviados pola Oficina de Emprego correspondente para participar nun proceso de selección regulado con todas as garantías.