O Concello de Vilagarcía de Arousa vén de reestruturar o seu organigrama municipal tras a saída de Lino Mouriño da corporación por motivos persoais.
O cargo de concelleiro de Obras e Servizos pasa agora a mans de Jose María González, quen xa formou parte do goberno municipal na anterior lexislatura (2019-2023) como responsable de Seguridade Cidadá.
O seu nomeamento foi autorizado pola Xunta Electoral e tomará posesión do cargo no pleno ordinario de finais deste mes de xaneiro.
Na presentación oficial este xoves 16, o alcalde Alberto Varela destacou a experiencia de González e a súa capacidade de xestión: “Toca darlle a benvida a alguén que non é novo. Jose María non parte de cero, ten moita experiencia e xa sabe o duro que é ser concelleiro”, subliñou o rexedor.
González asumirá as competencias de Obras, Vías Públicas, Mantemento dos Espazos Públicos Rurais, Iluminación, Sumidoiros e Cemiterios.
Por outra banda, a xestión dos residuos urbanos, a limpeza viaria e a limpeza das instalacións municipais serán agora responsabilidade da concelleira de Servizos Sociais, Tania García.
Segundo explicou o alcalde, esta redistribución responde a razóns de operatividade, xa que García colaboraba co anterior edil na elaboración dos novos pregos para o servizo de recollida de lixo e nas reunións co persoal.
O novo concelleiro manifestou o seu compromiso de manter un contacto directo coa cidadanía: “Os meus oídos están para escoitar a todos os veciños e veciñas. Que non dubiden en acudir a min porque volvo con máis ilusión e máis ganas que nunca”, asegurou José María González.
O Concello ten previsto iniciar agora unha rolda de reunións coas asociacións municipais e colectivos nos primeiros meses do ano, co obxectivo de avaliar a situación actual e avanzar nos proxectos pendentes coa maior axilidade posible.
O alcalde Alberto Varela recoñeceu que é un reto: “Jose María ten o listón moi alto porque Lino deixou unha pegada moi importante, pero confiamos nel e sabemos que vai facer unha gran labor, como xa fixo anteriormente”.
O goberno local, malia os cambios, garante a continuidade dos proxectos municipais en marcha.