José Precedo recibe en Pontevedra o Premio Xornalistas de Liberdade de Prensa coas fontes como principio irrenunciable

A Casa Consistorial de Pontevedra acolleu este sábado a entrega do XXII Premio Xornalistas de Liberdade de Prensa a José Precedo, nun acto organizado polo Colexio Profesional de Xornalistas de Galicia, coa colaboración do Concello.

Precedo, xornalista en elDiario.es, defendeu que a protección das fontes "é o primeiro mandamento da profesión", nun escenario no que, segundo apuntou, o xornalismo resulta cada vez máis necesario para a sociedade.

O evento comezou coas intervencións de Belén Regueira, decana do Colexio de Xornalistas, quen equiparou a información veraz coa auga potable e co aire limpo, e do alcalde de Pontevedra, Miguel Anxo Fernández Lores, que resaltou o papel dos medios libres nas sociedades democráticas.

Despois, a xornalista Belén López leu o manifesto do CPXG polo Día Internacional da Liberdade de Prensa, que puxo o foco na resistencia e na profesionalidade malia as dificultades do contexto actual.

Durante unha conversa mantida coa xornalista Natalia Puga, socia fundadora de PontevedraViva, José Precedo repasou a súa traxectoria: desde os primeiros anos nas redaccións galegas ata a súa experiencia en Madrid, lembrando coberturas emblemáticas como a catástrofe do Prestige, a investigación sobre Conde Roa en Santiago, ou a recente declaración no Tribunal Supremo nun caso de máxima repercusión institucional.

"Só entendo o xornalismo como traballo en equipo", destacou, remarcando a achega colectiva de todas as redaccións polas que pasou.

A súa intervención no Tribunal Supremo, no marco dunha investigación ao Fiscal Xeral do Estado, converteuse nun dos motivos centrais do galardón, ao defender con firmeza ante maxistrados e avogados o dereito ao segredo profesional e á independencia informativa.

"Un xornalista non pode revelar as fontes, nin en privado nin nun tribunal", afirmou, recoñecendo a presión mediática e persoal vivida tras esa comparecencia, pero convencido de que a ética profesional esixe manterse firme.

O xurado do premio destacou o rigor, a independencia e a mirada crítica de Precedo sobre o exercicio do poder, especialmente a través das investigacións relacionadas co funcionamento institucional en Madrid.

O galardón, continuador do histórico Premio José Couso, recoñece cada ano a profesionais ou colectivos destacados pola súa defensa da liberdade de prensa desde Galicia.

Belén Regueira, en representación do Colexio de Xornalistas, entregou ao galardoado unha fotografía de Mercedes Moralejo en recordo da cobertura do Prestige. Ao recibila, Precedo quixo repartir o mérito da distinción cos outros candidatos desta edición como a xornalista Mary Bruce e o colectivo de xornalistas de Nicaragua e, de xeito especial, cos seus compañeiros de redacción.

Segundo relatou, o seu equipo de compañeiros sufriu ameazas polo seu traballo. Tamén fixo mención ao persoal dos medios públicos galegos, que manteñen os actos reivindicativos dos "Venres negros" para esixir información de calidade. "Defenderei sempre, e ante quen sexa, o dereito profesional e a protección das fontes", sintetizou.

José Precedo salientou, xa cara ao remate do acto, o valor da reputación e da credibilidade nun oficio que, pese ás dificultades, considera imprescindible: "Talvez non sexa o máis bonito do mundo todos os días, pero si é un dos máis necesarios", admitiu ante o público que encheu a sala.

Na súa intervención final, avogou por un xornalismo que recupere a humildade e se centre en contar os problemas da cidadanía, afastándose da polarización que afecta ao ecosistema mediático actual.

Coa entrega deste premio, José Precedo súmase a unha listaxe de galardoados que inclúe a figuras e organizacións como o Sindicato de Xornalistas Palestinos, WikiLeaks ou Julia Otero, todos recoñecidos pola súa defensa activa da liberdade de prensa.

Ao acto asistiron, entre outras personalidades, o secretario xeral do PSdeG, José Ramón Gómez Besteiro, quen enxalzou o "xornalismo valente e con criterio de Precedo, capaz de incomodar ao poder cando é preciso". Tamén acudiron Abel Losada, subdelegado do Goberno, e Iván Puentes, portavoz municipal socialista.