A quinta edición de Lérez Up volverá reservar un espazo destacado ao K-Pop despois da boa acollida que esta proposta rexistrou nos últimos anos.
O K-pop é un xénero musical orixinario de Corea do Sur. Máis aló da música, é un fenómeno cultural integral que combina pop, hip hop e R&B con elaboradas coreografías, unha estética visual singular e un sistema de adestramento extremo para os artistas.
O festival Lérez Up, que se celebrará os días 12 e 13 de setembro no Recinto Feiral de Pontevedra, abriu este luns o prazo de inscrición para o seu concurso de baile e a resposta do público foi practicamente inmediata.
Segundo informou a organización, en menos de dúas horas xa se cubriran o 70% das prazas dispoñibles para participar na competición, un dato que confirma o crecente interese que esperta esta disciplina entre os asistentes ao evento.
O concurso desenvolverase o domingo 13 de setembro, a partir das 17.00 horas, e reunirá sobre o escenario arredor dunha vintena de actuacións.
Como novidade, nesta edición incrementaranse os premios económicos en ambas as categorías, nunha aposta por reforzar unha das actividades con maior seguimento dentro da programación.
A oferta da zona K-Pop estenderase durante toda a fin de semana con propostas tanto para afeccionados habituais como para persoas que queiran achegarse por primeira vez a este fenómeno cultural.
O programa incluirá sesións de Random Dance, un concurso musical para identificar cancións do xénero, unha charla introdutoria para descubrir como iniciarse no mundo do K-Pop e a proxección da xira Break the Wall da banda surcoreana Ateez.
A área contará un ano máis co patrocinio de WordPress.com, que renova a súa colaboración coa organización. Desde Lérez Up destacan que esta alianza está vinculada á creatividade e á creación de contidos, dous aspectos moi presentes na comunidade K-Pop, na que disciplinas como a fotografía, o vídeo, o deseño gráfico ou a xestión das redes sociais teñen un papel destacado tanto para os artistas como para os seguidores.
Lérez Up celebrará a súa quinta edición os días 12 e 13 de setembro no Recinto Feiral de Pontevedra cun programa centrado nos videoxogos, o cosplay, a cultura xaponesa, o K-Pop e outras formas de lecer alternativo.
As entradas xa están á venda e o prazo para inscribirse no concurso de K-Pop permanece aberto ata completar as prazas dispoñibles.
Engade Pontevedra Viva como fonte preferida de Google de balde
Mantente informado coas últimas noticias de actualidade.