Lérez Up! O Salón do Videoxogo e a Cultura Friki celebrarase en Pontevedra os días 13 e 14 de setembro, no Recinto Feiral.
A cuarta edición do evento, organizado por Gaming Troop co apoio do Concello de Pontevedra, preséntase como un espazo interxeracional para afeccionados aos videoxogos, o cosplay, a cultura xaponesa e o lecer alternativo.
Gaming Troop é unha asociación de videoxogos con sede propia na cidade do Lérez, que este mércores visitou o alcalde, Miguel Anxo Fernández Lores.
"É unha festa da cultura friki en Pontevedra", resumiu o alcalde quen destacou o crecemento deste evento co que "estamos encantados de colaborar".
Desde a asociación aseguran estar "moi ilusionados" por organizar por cuarto ano consecutivo este evento que fan de forma voluntaria e ao que se foron sumando novos colaboradores e patrocinadores.
Nada en 2016, o obxectivo desta asociación Gaming Troop é crear unha comunidade gamer local e autonómica, e neste tempo converteuse nunha organización capaz de xestionar eventos, talleres, torneos e actividades centradas nos videoxogos por toda Galicia.
Todo grazas ás capacidades dos seus socios, ao material informático e consolas reunidas durante os últimos anos.
A Lérez Up é o principal evento que organizan e a edición de 2025 chegará con novas actividades, talleres, charlas e competicións para todos os públicos.
Por exemplo, quen asista ao salón poderá forxar o seu propio sable de luz, deseñar a súa carta Pokémon en 3D e crear a súa criatura soñada, pintar miniaturas, aprender a dominar os trazos da caligrafía xaponesa, explorar o mundo da maquillaxe de efectos especiais coa aplicación de prótese de silicona. Tamén se poderán mergullar na moda lolita ou gozar de exhibicións deportivas de Kendo e Jugger.
Entre o máis destacado do salón figura o torneo nacional de Smash Bros Ultimate, un clásico que atrae a xogadores de toda España e Portugal.
A programación de videoxogos complétase cunha ampla lista de torneos oficiais, que inclúe títulos tan esperados como Mario Kart World (na nova Nintendo Switch 2), Fortnite, League of Legends, Valorant, Just Dance e Tekken 8.
Un dos pratos fortes será de novo o concurso de cosplay, que contará cun xurado profesional de excepción, coa presenza de recoñecidas cosplayers como Skullcaramel, Puchiluh e Antifta, pechando un trío de expertas que valorarán as caracterizacións e actuacións sobre o escenario ante 300 persoas.
A zona de xogos de mesa regresa da man da asociación Rotting Pizza con máis contido que nunca: haberá xogo libre, torneos de Catan, Warcrow e Punkapocalyptic (dous xogos de miniaturas con temática de fantasía e post-apocalíptica), un taller de pintura, un espazo de prototipos de xogos e creadores emerxentes, e tamén mesas de rol para mergullarse neste tipo de partidas.
O Lérez Up segue crecendo para manterse como referente en Galicia para os afeccionados ao gaming e a cultura alternativa. Haberá espazos para artistas, artesáns e comerciantes, xunto a unha zona indie dedicada a estudos de videoxogos independentes.
O compositor Yell0 ofrecerá un concerto en directo con reinterpretacións de bandas sonoras de videoxogos.
Na zona Idol Games, o público poderá participar en xogos de adiviñanzas como audiotrivial, bingotaku, adiviña o personaxe, karaoke libre e moitas sorpresas máis pensadas para a comunidade friki.
Pontelabs, asociación pontevedresa que promove a filosofía maker, traerá ao salón algúns dos seus proxectos feitos con impresoras 3D e ofrecerán un taller para pintar figuras Pokémon, unha actividade orientada ao público familiar e aos interesados na personalización.
As entradas están dispoñibles en Percalandia. As novidades e actualizacións poden seguirse nas redes de Gaming Troop e na páxina web oficial do evento.