Esta semana retomáronse os traballos de execución da humanización do entorno da dársena portuaria tras o parón habitual das empresas do sector da construción durante as festas do Nadal.
Esta actuación transformará este espazo nun "paseo continuo, seguro e verde" entre a Praza de España e o Paseo Alcalde Blanco.
O proxecto contempla a creación dunha zona máis amable e pensada para o desfrute da veciñanza e das persoas visitantes, con máis espazos verdes, bancos e mobiliario urbano que permitirán descansar e gozar da contorna marítima.
Estes elementos iranse instalando unha vez sexa posible acometer os traballos de formigonado.
Ademais, a actuación completarase coa colocación dunhas letras corpóreas co nome de Marín, chamadas a converterse nun novo símbolo da vila.
A alcaldesa, María Ramallo, e a concelleira Marián Sanmartín achegáronse ata a zona das obras xunto cos responsables da empresa adxudicataria para comprobar de primeira man o avance dos traballos.
Durante a visita, Ramallo explicou que nestes momentos están a barallar xunto coa empresa cal pode ser o material máis axeitado para unhas letras que "están chamadas a converterse nun punto emblemático da vila".
A rexedora lembrou que este proxecto é "unha das nosas apostas firmes pola recuperación de toda a zona que conecta a Praza de España co Paseo Alcalde Blanco".
Destacou a mellora xa acadada na lámina de auga, que antes presentaba un estado de abandono, con presenza de neumáticos, fondeos, amarres e restos de obra como cascotes, ladrillos e bloques de construción.
"Agora xa é evidente a limpeza da auga e do fondo", sinalou, avanzando que o seguinte paso será continuar coa integración do entorno, que estará rematada cara ao mes de marzo.
Ramallo subliñou tamén que tanto a intervención na lámina de auga como esta reforma urbana “supoñen cero euros de gasto para o Concello, xa que todo está financiado a través do Plan de Sostibilidade Turística, do que conseguimos unha ampliación de 300.000 euros”, para potenciar un espazo clave da fachada marítima de Marín.