Os traballadores dos quioscos da Rede Galega de Kioscos (Regaki), da Confederación Galega de Persoas con Discapacidade (Cogami), non terán que volver traballar nos establecementos aos que seguían asistindo a diario dende que en novembro de 2014 a empresa solicitou un concurso de acredores que incluía un Expediente de Regulación de Emprego. Nos últimos tempos acudían pasando frío, pois a finais de decembro cortáranlles os servizos básicos de luz e auga.
Os administradores concursais dispénsanos de seguir acudindo aos seus postos de traballo. Tomaron esa decisión baseándose en que as circunstancias actuais nas que se acha a empresa "poden chegar a comprometer que a prestación de servizos sexa desenvolvida en condicións óptimas de seguridade" para os traballadores que prestan servizos nos quioscos, que no caso de Pontevedra afecta a oito persoas de tres quioscos situados en Rosalía de Castro, praza de Galicia e avenida de Vigo.
Nun comunicado que foi remitido aos representantes dos traballadores este luns 9 de febreiro, a Administración concursal explica que decidiu conceder unha licenza retribuída á totalidade do persoal. A medida aplicarase de forma inmediata e durará ata que o Xulgado do Mercantil número 1 da Coruña tome unha decisión definitiva sobre o Expediente de Regulación de Emprego tramitado no marco do concurso voluntario de acredores.
Con esta medida, os traballadores quedan dispensados da prestación de servizos, pero conservarán o seu salario íntegro, se ben actualmente non o están recibindo, pois xa lles deben as nóminas de novembro, decembro e xaneiro e a paga extra de Nadal.